“என் வேண்டுகோளுக்கு செவிசாய்த்ததால் விலை குறைந்தது" – தங்கம் விலை குறித்து பிரதமர் மோடி

Spread the love

மத்திய கிழக்கு நாடுகளில் ஏற்பட்ட போர்ப் பதற்றத்தால் கச்சா எண்ணெய் விலை உயர்ந்து, இந்தியாவின் அந்நியச் செலாவணி கையிருப்புக்கு நெருக்கடி சூழல் ஏற்பட்டது. அதைத் தொடர்ந்து, கடந்த மே மாதம் ஹைதராபாத்தில் நடைபெற்ற பொதுக்கூட்டத்தில் உரையாற்றிய பிரதமர் மோடி, “அந்நியச் செலாவணி அதிகம் செலவாகும் மற்றொரு முக்கியத் துறை தங்கம். தேச நலன் கருதி, ஓராண்டுக்குத் தங்கம் வாங்குவதில்லை என நாம் உறுதி ஏற்க வேண்டும்,” எனக் கூறியிருந்தார். கடந்த செப்டம்பர் மாதமும் அவசியமின்றித் தங்கம் வாங்குவதைத் தவிர்க்குமாறு அவர் மீண்டும் வலியுறுத்தினார்.

இதற்கிடையே, கடந்த மே மாதம் தங்கம் மற்றும் வெள்ளி மீதான இறக்குமதி வரியை 6 சதவீதத்திலிருந்து 15 சதவீதமாக மத்திய அரசு உயர்த்தியதும் குறிப்பிடத்தக்கது. பிரதமரின் வேண்டுகோளைத் தொடர்ந்து நாட்டில் தங்கத்திற்கான தேவை பெருமளவில் குறைந்துள்ளதைப் புள்ளிவிவரங்கள் உறுதிப்படுத்துகின்றன. மத்திய அரசின் தரவுகளின்படி, கடந்த ஏப்ரல் முதல் அக்டோபர் வரையிலான காலகட்டத்தில் அதிகாரப்பூர்வ தங்க இறக்குமதி சுமார் 40 சதவீதம் சரிந்துள்ளது.

முந்தைய ஆண்டின் இதே காலகட்டத்தில் 41.24 பில்லியன் டாலராக இருந்த தங்க இறக்குமதி, தற்போது 24.78 பில்லியன் டாலராகக் குறைந்துள்ளது. இதேபோல், உலகத் தங்க கவுன்சில் (World Gold Council) வெளியிட்டுள்ள தரவுகளின்படி, ஜூலை முதல் செப்டம்பர் வரையிலான காலாண்டில் தங்கத்திற்கான தேவை முந்தைய ஆண்டை விட 29 சதவீதம் குறைந்து 162 டன்னாகப் பதிவாகியுள்ளது. இதில் ஆபரணத் தங்கத்திற்கான தேவை 20 சதவீதம் சரிந்து சுமார் 100 டன்னாகக் குறைந்துள்ளது.

மோடி

இந்த நிலையில், உத்தரப் பிரதேச மாநிலம் லக்னோவில் உள்ள கோமதி நகரில் அமைந்துள்ள இந்திரா காந்தி பிரதிஷ்டானில் நேற்று 5-வது தேசியத் திறன் பட்டமளிப்பு விழா நடைபெற்றது. இந்த நிகழ்வில் பிரதமர் மோடி கலந்துகொண்டு உரையாற்றினார். அப்போது, “அவசியம் இல்லாவிட்டால் ஓராண்டுக்குத் தங்கம் வாங்க வேண்டாம் என்று நாட்டு மக்களிடம் நான் வேண்டுகோள் விடுத்திருந்தேன். 1965-ம் ஆண்டு நாட்டில் கடும் உணவுப் பஞ்சம் ஏற்பட்டபோது, முன்னாள் பிரதமர் லால் பகதூர் சாஸ்திரி ஒரு வேளை உணவைத் தவிர்க்குமாறு விடுத்த அழைப்பை மக்கள் ஏற்றுக்கொண்டனர்.

நமது நாடு இன்றும் அதே குணாதிசயத்தைக் கொண்டுள்ளது. என்னைப் போன்ற ஒரு சாதாரண மனிதன் தங்கம் வாங்குவதைக் குறைக்குமாறு கேட்டதற்கு மக்கள் செவிசாய்த்தனர். அதனால் தங்கத்தின் விலை குறைந்தது. இன்று மக்கள் என்னிடம், ‘மோடி ஜி, நீங்கள் சொன்னீர்கள், நாங்கள் உங்கள் அறிவுரையைக் கேட்டோம், அதனால் எங்கள் பணம் மிச்சமானது’ என்று கூறுகிறார்கள்,” எனக் குறிப்பிட்டார்.

Junior Vikatan-ன் பிரத்யேக Whatsapp Group…

இணைவதற்கு இங்கே க்ளிக் செய்யவும்… https://tinyurl.com/2b963ppb

வணக்கம்,

BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/2b963ppb

நன்றி

Leave a Reply

Your email address will not be published. Required fields are marked *