International
oi-Hema Vandhana
சிங்கப்பூர்: வெளிநாடுகளுக்கு போக வேண்டும் என்றாலே, பலருக்கும் முதலில் நினைவுக்கு வருவது விசாதான். எந்த நாட்டுக்குப் போனாலும் விசா வாங்க வேண்டுமா, ஈஸியாக போக முடியுமா என்ற கேள்விகள் இருக்கும். ஆனால், சில நாடுகளின் பாஸ்போர்ட் வைத்திருப்பவர்கள் முன்கூட்டியே விசா வாங்காமலேயே ஏராளமான இடங்களுக்குப் பயணம் செய்யலாம். அப்படிப்பட்ட பாஸ்போர்ட்டுகளில் உலகிலேயே முதலிடத்தில் இருப்பது எந்த நாடு தெரியுமா? சிங்கப்பூர்!
2026 அக்டோபர் மாதத்துக்கான ஹென்லி பாஸ்போர்ட் குறியீட்டின்படி, உலகின் சக்திவாய்ந்த பாஸ்போர்ட்டுகள் பட்டியலில் சிங்கப்பூர் முதலிடத்தைப் பிடித்திருக்கிறது. அந்த நாட்டின் பாஸ்போர்ட் வைத்திருப்பவர்கள் முன்கூட்டியே விசா வாங்காமல் 193 பயண இடங்களுக்குச் செல்ல முடியும்.
டாப் 5 – ஹிட்டடித்த சிங்கப்பூர்
அடுத்து 2-வது இடத்தில் எந்த நாடுகள் இருக்கின்றன தெரியுமா? ஜப்பான், தென் கொரியா, ஐக்கிய அரபு அமீரகம் ஆகிய 3 நாடுகளும் இந்த இடத்தைப் பகிர்ந்துகொண்டுள்ளன. இந்த நாடுகளின் பாஸ்போர்ட் வைத்திருப்பவர்கள் தலா 188 பயண இடங்களுக்குச் செல்ல முடியும்.
ஸ்வீடன் 187 பயண இடங்களுக்கான வசதியுடன் 3-வது இடத்தில் இருக்கிறது. பெல்ஜியம், டென்மார்க், பின்லாந்து, பிரான்ஸ், ஜெர்மனி, அயர்லாந்து, இத்தாலி, லக்ஸம்பர்க், நெதர்லாந்து, நார்வே, ஸ்பெயின் ஆகிய நாடுகள் 186 பயண இடங்களுக்கான வசதியுடன் 4-வது இடத்தைப் பகிர்ந்துள்ளன.
ஆஸ்திரியா, கிரீஸ், மால்டா, போர்ச்சுகல், சுவிட்சர்லாந்து ஆகிய நாடுகள் 185 பயண இடங்களுக்கான வசதியுடன் 5-வது இடத்தில் இருக்கின்றன.
இந்தியாவுக்கு எந்த இடம்?
இந்திய பாஸ்போர்ட்டுக்கு இந்தப் பட்டியலில் 84-வது இடம் கிடைத்திருக்கிறது. கடந்த 2025 அக்டோபரில் இந்தியா 85-வது இடத்தில் இருந்தது. இப்போது ஒரு இடம் முன்னேறியிருக்கிறது. ஆனால், அதே நேரத்தில் முன்கூட்டியே விசா வாங்காமல் செல்லக்கூடிய பயண இடங்களின் எண்ணிக்கை 57-லிருந்து 55 ஆகக் குறைந்துள்ளது.
இந்தியாவுடன் அல்ஜீரியா, மொரிட்டானியா ஆகிய நாடுகளும் 84-வது இடத்தைப் பகிர்ந்துள்ளன. இங்கேதான் ஒரு விஷயம்.. தரவரிசையில் இந்தியா முன்னேறியிருந்தாலும், விசா இல்லாமல் பயணம் செய்யக்கூடிய இடங்களின் எண்ணிக்கை குறைந்திருக்கிறது.
லிஸ்ட் எப்படி ரெடியாகிறது
ஒரு நாட்டின் பாஸ்போர்ட் வைத்திருப்பவர்கள் எத்தனை நாடுகள் அல்லது பயண இடங்களுக்கு செல்வதற்கு முன்கூட்டியே விசா வாங்க வேண்டியதில்லை என்பதை வைத்து இந்தத் தரவரிசை தயாரிக்கப்படுகிறது.
2026 அக்டோபர் மாதத்துக்கான ஹென்லி பட்டியலில் 199 பாஸ்போர்ட்டுகளும், 227 பயண இடங்களும் கணக்கில் எடுத்துக்கொள்ளப்பட்டுள்ளன.
இங்கே ஒரு விஷயத்தை புரிந்துகொள்ள வேண்டும்… 55 பயண இடங்களுக்கு முன்கூட்டியே விசா வாங்காமல் செல்லலாம் என்பதற்காக, அந்த இடங்கள் அனைத்துக்கும் எந்தவிதமான அனுமதியும் இல்லாமல் செல்லலாம் என்றெல்லாம் அர்த்தமில்லை. சில நாடுகளில் சென்றடைந்த பிறகு விசா வாங்க வேண்டியிருக்கலாம் அல்லது வேறு பயண அனுமதி தேவைப்படலாம். அதனால், வெளிநாட்டுக்கு பயணம் செய்வதற்கு முன்பு அந்த நாட்டின் விசா விதிகளைச் சரிபார்த்துக்கொள்வது அவசியம்.
மொத்தத்தில், உலகின் சக்திவாய்ந்த பாஸ்போர்ட்டுகள் பட்டியலில் சிங்கப்பூர் முதலிடத்தில் இருக்கிறது. இந்தியா ஒரு இடம் முன்னேறியிருந்தாலும், முன்கூட்டியே விசா வாங்காமல் செல்லக்கூடிய பயண இடங்களின் எண்ணிக்கை குறைந்திருப்பது கவனிக்க வேண்டிய விஷயமாக இருக்கிறது..!!!
