காங்கிரஸ் நாடாளுமன்றக் கட்சித் தலைவர் சோனியா காந்தி வியாழக்கிழமை இன்ஸ்டாகிராமில் இணைதுள்ளார். மேலும், நவம்பர் 10-ம் தேதி வெளியாகவுள்ள தனது நினைவுக் குறிப்புகள் அடங்கிய ‘Belonging: A Journey of Love’ என்ற புத்தகத்தின் முதல் தோற்றத்தையும் அவர் பகிர்ந்துள்ளார்.
இன்ஸ்டாகிராம் சமூக வலைத்தளத்தில் தனது முதல் பதிவை வெளியிட்ட 79 வயதான சோனியா காந்தி, இந்தப் புத்தகத்தை வாசகர்களுக்கு அறிமுகப்படுத்தியதோடு, தங்களுடன் இந்தத் தருணத்தைப் பகிர்ந்து கொள்வதில் மகிழ்ச்சி அடைவதாகவும் தெரிவித்துள்ளார்.
அந்தப் பதிவில், “அனைவருக்கும் வணக்கம். Belonging: A Journey of Love புத்தகத்தின் முதல் தோற்றத்தை உங்களுடன் பகிர்ந்து கொள்வதில் நான் உண்மையிலேயே மகிழ்ச்சியடைகிறேன். இது அன்பு, கடமை, இழப்பு மற்றும் தனக்கான ஓர் இடத்தைக் கண்டறிவது பற்றிய கதை. இதை உங்களுடன் பகிர்ந்து கொள்ள ஆவலாக இருக்கிறேன்” என்று குறிப்பிட்டுள்ளார்.
இந்தப் புத்தகம், போருக்குப் பிந்தைய இத்தாலியில் தனது குழந்தைப் பருவம் தொடங்கி, முன்னாள் பிரதமர் ராஜீவ் காந்தியுடனான காதல், திருமண வாழ்க்கை மற்றும் தனது வாழ்க்கையை மாற்றிய தனிப்பட்ட இழப்புகள் வரை சோனியா காந்தியின் பயணத்தை விவரிக்கிறது.
குழந்தைப் பருவம் முதல் ராஜீவ் காந்தி வரையிலான வாழ்க்கைப் பயணம்!
இத்தாலியில் பிறந்த சோனியா காந்தி, 1965-ம் ஆண்டு இங்கிலாந்தின் கேம்பிரிட்ஜில் படித்துக் கொண்டிருந்தபோது, அங்கு ராஜீவ் காந்தியைச் சந்தித்தார். அப்போது அவருக்கு 19 வயது. இருவரும் 1968-ம் ஆண்டு பிப்ரவரி 25-ம் தேதி திருமணம் செய்து கொண்டனர்.
இந்த நினைவுக் குறிப்புகளில், ராஜீவ் காந்தியுடனான காதல், அவரது மாமியாரும் முன்னாள் பிரதமருமான இந்திரா காந்தியின் படுகொலை, தனது கணவர் ராஜீவ் காந்தியின் படுகொலை உள்ளிட்ட வாழ்க்கையின் மிகக் கடினமான தருணங்கள் இடம்பெற்றுள்ளன.
காங்கிரஸ் கட்சியின் மிக நீண்ட காலம் தலைவராகப் பணியாற்றியவர் என்ற பெருமையையும் சோனியா காந்தி பெற்றுள்ளார். நேரு–காந்தி குடும்பத்தின் ஓர் உறுப்பினராகவும், இந்தியாவில் தனது வாழ்க்கையை அமைத்துக் கொண்டவராகவும் அவர் எதிர்கொண்ட அனுபவங்கள் இந்த நூலில் இடம்பெறும் என எதிர்பார்க்கப்படுகிறது.
தாயின் புத்தகம் குறித்து பெருமிதம் தெரிவித்த ராகுல் காந்தி!
சோனியா காந்தியின் புத்தகம் குறித்து மக்களவை எதிர்க்கட்சித் தலைவர் ராகுல் காந்தியும் ஏற்கெனவே மகிழ்ச்சி தெரிவித்துள்ளார்.
தனது தந்தை ராஜீவ் காந்தியின் 82-வது பிறந்தநாளின்போது அவர் வெளியிட்ட பதிவில், தனது தாயின் வாழ்க்கைக் கதை மில்லியன் கணக்கான வாசகர்களைச் சென்றடைய இருப்பதில் பெருமிதம் கொள்வதாகக் குறிப்பிட்டிருந்தார்.
அந்தப் பதிவில், “அம்மா, உங்களுடைய ‘Belonging: A Journey of Love’ என்ற கதை இறுதியாக உங்களை நேசிக்கும் கோடிக்கணக்கான மக்களால் வாசிக்கப்பட இருப்பதில் நான் மகிழ்ச்சியடைகிறேன்; பெருமையும் கொள்கிறேன். தனிப்பட்ட வாழ்க்கையைப் பொதுவெளியில் பகிர்ந்து கொள்ள விரும்பாத உங்களுக்கு, உங்கள் அழகான கதையை உலகத்திடம் சொல்வது எவ்வளவு கடினமாக இருந்திருக்கும் என்பதை நான் அறிவேன். அப்பாவின் பிறந்தநாளில், அவர் மேலிருந்து தனது அழகான சோனியாவைப் பெருமையுடன் பார்த்து புன்னகைப்பதை என்னால் உணர முடிகிறது” என்று ராகுல் காந்தி தெரிவித்திருந்தார்.
இந்தியாவில் புத்தகம் வெளியாவதில் சிக்கல்!
சோனியா காந்தியின் நினைவுக் குறிப்புகள் அடங்கிய இந்தப் புத்தகத்தை, சர்வதேச அளவில் நவம்பர் 10-ம் தேதி Alfred A. Knopf நிறுவனம் வெளியிடுகிறது. இந்த அறிவிப்பு ஆகஸ்ட் 18-ம் தேதி வெளியிடப்பட்டது.
ஆனால், இந்தியாவில் இந்தப் புத்தகத்தை வெளியிடுவது தொடர்பாக ஆரம்பத்தில் சிக்கல் ஏற்பட்டது. பதிப்பக நிறுவனமான Penguin Random House India (PRHI) மற்றும் சோனியா காந்தியின் பிரதிநிதிகள் இடையே, புத்தகத்தின் உள்ளடக்கத்தில் மேற்கொள்ள வேண்டிய சில திருத்தங்கள் தொடர்பாக கருத்து வேறுபாடு ஏற்பட்டது.
வழக்கமான தலையங்க ஆய்வின்போது ஒரு குறிப்பிட்ட விவகாரத்தில் உடன்பாடு எட்ட முடியாத நிலை ஏற்பட்டதாக பென்குயின் இந்தியா தெரிவித்தது. சில திருத்தங்களை ஏற்றுக்கொண்டதாகவும், சில விஷயங்களில் ஆசிரியரின் நிலைப்பாட்டை ஏற்றதாகவும் கூறிய அந்த நிறுவனம், ஒரு விவகாரத்தில் மட்டும் உடன்பாடு ஏற்படவில்லை என விளக்கியது.
மேலும், இந்த முடிவில் வெளிப்புற அழுத்தம் எதுவும் இல்லை என்றும் பென்குயின் இந்தியா மறுத்தது. ஒப்பந்த நிபந்தனைகள் மற்றும் ஆசிரியரின் ரகசியத்தன்மையைக் கருத்தில் கொண்டு, கருத்து வேறுபாட்டுக்கான முழு விவரங்களையும் வெளியிட முடியாது என்றும் தெரிவித்தது.
மோடி, ஆர்.எஸ்.எஸ். குறித்த பகுதிகளால் அரசியல் சர்ச்சை!
இந்தப் பதிப்பக விவகாரம் அரசியல் சர்ச்சையாகவும் மாறியது. பிரதமர் நரேந்திர மோடி, ராஷ்ட்ரீய ஸ்வயம்சேவக் சங்கம் (RSS) மற்றும் மோடி தலைமையிலான அரசின் ஆட்சிக் காலத்தில் இந்தியப் பகுதிகளைச் சீனா ஆக்கிரமித்தது தொடர்பான தகவல்கள் புத்தகத்தில் இடம்பெற்றிருந்ததாகவும், அவற்றை நீக்க அழுத்தம் கொடுக்கப்பட்டதாகவும் காங்கிரஸ் தலைவர்கள் குற்றம்சாட்டினர்.
ராஜஸ்தான் முன்னாள் முதலமைச்சர் அசோக் கெலாட், இந்த விவகாரத்தை “ஜனநாயகத்தின் படுகொலை” என்று விமர்சித்தார்.
ஆனால், வெளிப்புறத் தலையீடு இருந்ததாகக் கூறப்படுவதை பென்குயின் இந்தியா மறுத்தது. உண்மைச் சரிபார்ப்பு மற்றும் பரிந்துரைகள் உள்ளிட்ட வழக்கமான தலையங்க நடைமுறைகளின் அடிப்படையிலேயே புத்தகம் ஆய்வு செய்யப்பட்டதாக அந்த நிறுவனம் தெரிவித்தது.
இதற்கிடையில், இந்தியப் பதிப்பை வெளியிட HarperCollins India நிறுவனம் முன்வந்தது. இதன் மூலம் சர்வதேச வெளியீட்டு நாளான நவம்பர் 10-ம் தேதியே இந்தியாவிலும் புத்தகம் வெளியாகும் என எதிர்பார்க்கப்படுகிறது.
பென்குயின் இந்தியா இந்த ஒப்பந்தத்திலிருந்து விலகியதைத் தொடர்ந்து, இந்தியப் பதிப்பின் வெளியீடு குறித்த விவகாரம் சர்ச்சைக்குரியதாகவே இருந்து வந்தது.
இந்நிலையில், சோனியா காந்தி இன்ஸ்டாகிராமில் அறிமுகமாகி, தனது புத்தகத்தின் முதல் தோற்றத்தைப் பகிர்ந்திருப்பது, அவரது தனிப்பட்ட வாழ்க்கைப் பயணத்தை அறிந்துகொள்ள ஆவலாக இருக்கும் வாசகர்களிடையே கவனத்தை ஈர்த்துள்ளது.
https://www.instagram.com/soniagandhi/?utm_source=ig_embed&ig_rid=AxsjZgDYd9KYRtyKXkio0gS
