தமிழக மக்களே உஷார்! 10 மாவட்டங்களில் கனமழைக்கு வாய்ப்பு! வானிலை மையம் அலெர்ட்! – Kumudam

Spread the love

தமிழ்நாடு, புதுச்சேரி மற்றும் காரைக்கால் பகுதிகளில் இன்று (நவம்பர் 20) பொதுவாக வறண்ட வானிலை நிலவி வருகிறது. வங்கக்கடலில் உருவான அக்வான் (Akvan) தீவிர புயல், தெற்கு ஒடிசா மற்றும் வடக்கு ஆந்திரப் பிரதேச கடலோரப் பகுதிகளில் கோபால்பூருக்கு அருகே இன்று காலை கரையைக் கடந்தது. இதையடுத்து புயல் படிப்படியாக வலுவிழந்து வருகிறது. இதற்கிடையே, தமிழகத்தின் கடலோர மாவட்டங்களில் வரும் நவம்பர் 22ஆம் தேதி மிதமான மழை பெய்ய வாய்ப்புள்ளதாக வானிலை ஆய்வு மையம் தெரிவித்துள்ளது.

அக்வான் புயல் கரையைக் கடந்தது!

மத்தியமேற்கு வங்கக்கடல் பகுதியில் நிலவிய அக்வான் தீவிர புயல், வடக்கு மற்றும் வடமேற்கு திசையில் நகர்ந்து இன்று அதிகாலை 2.30 மணியளவில் சாதாரண புயலாக வலுவிழந்தது. தொடர்ந்து நகர்ந்த இந்தப் புயல், இன்று காலை 7.30 மணி முதல் 8.30 மணிக்குள் தெற்கு ஒடிசா மற்றும் வடக்கு ஆந்திரப் பிரதேச கடலோரப் பகுதிகளில் கோபால்பூருக்கு அருகே கரையைக் கடந்தது.

தற்போது வடக்கு மற்றும் வடகிழக்கு திசையில் நகர்ந்து வரும் இந்தப் புயல், அடுத்த 3 மணி நேரத்தில் ஆழ்ந்த காற்றழுத்த தாழ்வு மண்டலமாகவும், அதற்கடுத்த 6 மணி நேரத்தில் காற்றழுத்த தாழ்வு மண்டலமாகவும் வலுவிழக்கக்கூடும் எனக் கணிக்கப்பட்டுள்ளது.

நவம்பர் 20, 21: தமிழகத்தில் மழைக்கு வாய்ப்பு!

இன்று (நவம்பர் 20) மற்றும் நாளை (நவம்பர் 21) மேற்கு தொடர்ச்சி மலையை ஒட்டிய மாவட்டங்கள் மற்றும் தென் தமிழகத்தின் ஓரிரு இடங்களில் லேசான மழை பெய்யக்கூடும். ஏனைய தமிழக மாவட்டங்கள், புதுச்சேரி மற்றும் காரைக்கால் பகுதிகளில் பொதுவாக வறண்ட வானிலையே நிலவும் எனத் தெரிவிக்கப்பட்டுள்ளது.

நவம்பர் 22: 10 மாவட்டங்களில் மிதமான மழை!

வரும் நவம்பர் 22ஆம் தேதி தமிழகத்தின் கடலோர மாவட்டங்களில் மழை பெய்வதற்கான வாய்ப்பு உள்ளது. குறிப்பாக, சென்னை, திருவள்ளூர், செங்கல்பட்டு, விழுப்புரம், கடலூர், தஞ்சாவூர், திருவாரூர், நாகப்பட்டினம், புதுக்கோட்டை மற்றும் இராமநாதபுரம் ஆகிய 10 மாவட்டங்களின் ஓரிரு இடங்களில் மிதமான மழை பெய்யக்கூடும்.

மேலும், புதுச்சேரி மற்றும் காரைக்கால் பகுதிகளிலும் மிதமான மழைக்கு வாய்ப்புள்ளது. கடலோர தமிழகத்தை ஒட்டிய மற்ற மாவட்டங்கள் மற்றும் தெற்கு கடலோர மாவட்டங்களின் ஓரிரு இடங்களில் லேசான மழை பெய்யக்கூடும். ஏனைய தமிழகப் பகுதிகளில் வறண்ட வானிலை நிலவும் என எதிர்பார்க்கப்படுகிறது.

நீலகிரி, கொடைக்கானலில் உறைபனி எச்சரிக்கை!

தமிழகத்தின் மலைப்பகுதிகளில் நிலவும் குளிரின் தாக்கம் காரணமாக நீலகிரி மாவட்டம் மற்றும் திண்டுக்கல் மாவட்டத்தில் உள்ள கொடைக்கானல் மலைப்பகுதிகளில் உறைபனி ஏற்பட வாய்ப்புள்ளதாக எச்சரிக்கை விடுக்கப்பட்டுள்ளது.

இன்று (நவம்பர் 20) முதல் நவம்பர் 22ஆம் தேதி வரை இந்தப் பகுதிகளின் ஓரிரு இடங்களில் இரவு மற்றும் அதிகாலை நேரங்களில் உறைபனி ஏற்படக்கூடும் என வானிலை ஆய்வு மையம் தெரிவித்துள்ளது.

தமிழகத்தில் வெப்பநிலை எப்படி இருக்கும்?

நவம்பர் 20 முதல் 22ஆம் தேதி வரை தமிழ்நாடு, புதுச்சேரி மற்றும் காரைக்கால் பகுதிகளில் அதிகபட்ச வெப்பநிலையில் குறிப்பிடத்தக்க மாற்றம் இருக்காது. இருப்பினும், சில இடங்களில் வெப்பநிலை சற்று உயரக்கூடும்.

மேலும், தமிழகத்தின் ஓரிரு இடங்களில் அதிகபட்ச வெப்பநிலை இயல்பைவிட 2 முதல் 3 டிகிரி செல்சியஸ் வரை அதிகமாக இருக்க வாய்ப்புள்ளது.

சென்னையின் வானிலை நிலவரம்!

சென்னை மற்றும் புறநகர்ப் பகுதிகளில் இன்று (நவம்பர் 20) மற்றும் நாளை (நவம்பர் 21) வானம் ஓரளவு மேகமூட்டத்துடன் காணப்படும். பொதுவாக வறண்ட வானிலை நிலவக்கூடும்.

சென்னையில் அதிகபட்ச வெப்பநிலை 32 முதல் 33 டிகிரி செல்சியஸ் வரையிலும், குறைந்தபட்ச வெப்பநிலை 22 முதல் 23 டிகிரி செல்சியஸ் வரையிலும் இருக்கக்கூடும் என வானிலை ஆய்வு மையம் தெரிவித்துள்ளது.

நன்றி

Leave a Reply

Your email address will not be published. Required fields are marked *