விஜய் டிவியில் பிக்பாஸ் சீசன் 10 துவங்க இன்னும் ஓரிரு மாதங்கள் இருக்கும் சூழலில், இந்த வருடம் புது முயற்சியாக ’பிக்பாஸ் காமன் மேன்’ என்ற நிகழ்ச்சி நடைபெற இருக்கிறது.
அதாவது பிக்பாஸ் நிகழ்ச்சியில் கலந்து கொள்ள விரும்பும் யாரும் இந்த நிகழ்ச்சிக்கு விண்ணப்பிக்கலாம். தேர்வாகிறவர்கள் பிக்பாஸ் காமன் மேன் நிகழ்ச்சியில் கலந்து கொள்வார்கள். நிகழ்ச்சியில் பெர்ஃபார்மன்ஸை பொறுத்து அவர்களில் சிலர் பிக்பாஸ் சீசன் 10 ல் ஒரு போட்டியாளராக அனுப்பப் படவிருக்கிறார்கள்.
பிக் பாஸ் காமன் மேனுக்கான புரமோ சில தினங்களுக்கு முன் வெளியானது நினைவிருக்கலாம். புரொமோவில் விஜய் சேதுபதி வந்த நிலையில் இந்த நிகழ்ச்சியைத் தொகுத்து வழங்கப் போவது அவரில்லை என்கிறார்கள்.
தற்போது ஏராளமானோர் இந்த நிகழ்ச்சியில் கலந்து கொள்ள விண்ணப்பித்திருப்பதாகக் கூறப்படுகிறது.
வரும் செப்டம்பர் மாதம் ஒளிபரப்பு தொடங்கவிருக்கும் பிக் பாஸ் காமன் மேன் ஷோ சுமார் இருபத்தைந்து எபிசோடுகள் வரை ஒளிபரப்பாகலாமென எதிர்பார்க்கப்படுகிறது.
இந்தச் சூழலில் இந்த காமன் மேன் நிகழ்ச்சியைத் தொகுத்து வழங்க தொகுப்பாளரைத் தேடும் பணியை முடுக்கி விட்டிருந்த தயாரிப்புத் தரப்பு தற்போது தொகுப்பாளரை டிக் செய்து விட்டதாகத் தெரிய வருகிறது.
நமக்குக் கிடைத்த தகவல் படி பிக்பாஸ் 7வது சீசனில் ஒரு போட்டியாளராகக் கலந்து கொண்டு கவனம் ஈர்த்த மாயா, 8வது சீசனில் டைட்டில் வென்ற முத்துக்குமரன் இரண்டு பேருமே டிக் லிஸ்டில் இருக்கிறார்கள். இவர்கள் இருவரில் ஒருவர் அல்லது இரண்டு பேருமே தொகுத்து வழங்கினாலும் ஆச்சரியப்படுவதற்கில்லையாம்.
நிகழ்ச்சியில் புரொமோ வெளியாகிற போது இந்த தகவல் அதிகாரபூர்வமாக வெளியாகுமென்கிறார்கள்.!
