Doctor Vikatan: நான் அசைவ உணவுகளே சாப்பிடுவதில்லை. ஆனாலும் எப்போது பிளட் டெஸ்ட் செய்தாலும் எனக்கு கொழுப்பு (Cholesterol) அதிகமாக இருப்பதாகவே ரிப்போர்ட்டில் வருகிறது. இதற்கு என்ன காரணம்… அதிகப்படியான கொழுப்பை எப்படிக் குறைப்பது?
பதில் சொல்கிறார், சென்னையைச் சேர்ந்த ஊட்டச்சத்து ஆலோசகர் அம்பிகா சேகர்.
கொழுப்பு அதிகமாக இருப்பதற்கு அசைவ உணவுப் பழக்கம்தான் காரணமாக இருக்கும் என அர்த்தமில்லை. சைவ உணவுப் பழக்கம் உள்ளவர்களுக்கும் கொழுப்பு அதிகமாக இருக்கலாம். ரத்தத்தில் உள்ள கொழுப்பில் சுமார் 80% நமது கல்லீரலால் (Liver) சுயமாக உற்பத்தி செய்யப்படுகிறது. மீதமுள்ள 20% மட்டுமே நாம் சாப்பிடும் உணவிலிருந்து வருகிறது. உங்கள் மரபணு அல்லது பரம்பரையில் (Genetics) யாருக்கேனும் அதிக கொழுப்பு பிரச்னை இருந்தால், உங்கள் கல்லீரல் இயற்கையாகவே அதிக கொழுப்பை உற்பத்தி செய்ய வாய்ப்புள்ளது
நம் உடலுக்குத் தேவைக்கு அதிகமான ஆற்றல் கிடைக்கும்போது, உடல் அதை வீணாக்க விரும்பாது. உடல், அதைக் கொழுப்பாகச் சேமித்து வைத்துக்கொள்ளும். அதன் தொடர்ச்சியாக ரத்தத்திலும் கொழுப்பு அதிகமாகக் காட்டும். சைவ உணவுக்காரர்களும் கொழுப்புச்சத்துள்ள உணவுகளைச் சாப்பிடும்பட்சத்தில் அவர்களுக்கும் பிரச்னைகள் வரவே செய்யும். நெய், எண்ணெய் உணவுகள், இனிப்புகள் போன்றவற்றைச் சாப்பிடும்போது கொழுப்பு அதிகரிக்கும்.
பிஸ்கட், பப்ஸ், கேக் உள்ளிட்ட பேக்கரி உணவுகள், சிப்ஸ், சமோசா மற்றும் எண்ணெயில் பலமுறை பொரித்த உணவுகளில் ‘டிரான்ஸ் ஃபேட்’ (Trans fat) அதிகமிருக்கும். இது அசைவ உணவுகளை விட மிக வேகமாக உடலில் கெட்ட கொழுப்பை ஏற்றும் தன்மையுடையது. உடல் உழைப்பு குறைந்து, ஒரே இடத்தில் அமர்ந்து வேலை செய்வது நல்ல கொழுப்பைக் (HDL) குறைத்து, கெட்ட கொழுப்பை (LDL) அதிகரிக்கச் செய்யும். நாள்பட்ட மன அழுத்தம் (Stress) உடலில் கார்டிசால் (Cortisol) ஹார்மோனைத் தூண்டி, கொழுப்பு உற்பத்தியை அதிகரிக்கும். போதிய தூக்கமின்மையும் கொழுப்பு அளவை பாதிக்கும்.
சைவமோ, அசைவமோ… எந்த உணவுப்பழக்கம் உள்ளவர்களுக்கும் தினசரி உடற்பயிற்சி மிக முக்கியம். அதன் மூலம் கொழுப்பு கட்டுப்பாட்டுக்குள் வரும். இதைத் தாண்டி, சிலருக்கு மரபியல் ரீதியாகவும் கொழுப்பு அதிகமாக இருக்கும் வாய்ப்புகள் உண்டு. நீரிழிவு பாதிக்கும்போது கொலஸ்ட்ரால் அதிகரிக்கும். ஸ்ட்ரெஸ் அதிகமானால்கூட கொலஸ்ட்ரால் அளவும் அதிகரிக்கலாம்.
எனவே, உணவுக்கட்டுப்பாடு, உடற்பயிற்சி இரண்டுமே இந்த விஷயத்தில் முக்கியம். டெஸ்ட் ரிப்போர்ட்டை மருத்துவரிடம் காட்டி, தேவைப்பட்டால் தற்காலிகமாக மருந்துகள் எடுத்துக்கொண்டு, கொழுப்பைக் குறைக்க முயற்சி செய்யலாம். அதன் பிறகு உணவுக்கட்டுப்பாடு மற்றும் உடற்பயிற்சியின் மூலம் சரியான அளவைத் தக்க வைக்கலாம்.
உங்கள் கேள்விகளை கமென்ட் பகுதியில் பகிர்ந்துகொள்ளுங்கள்; அதற்கான பதில்கள் தினமும் விகடன் இணையதளத்தில் #DoctorVikatan என்ற பெயரில் வெளியாகும்.
