இன்றைக்கு இந்தியா முழுக்க இருக்கும் ஆண்கள் மட்டுமல்ல, பெண்களும் மியூச்சுவல் ஃபண்ட் முதலீட்டை நோக்கி வேகமாக வந்துகொண்டு இருக்கிறார்கள். இத்தனை நாளும் தங்கத்தில் மட்டுமே பணத்தைப் போட்டுக்கொண்டு இருந்தோம்; இனி தங்கத்தைத் தாண்டி, மியூச்சுவல் ஃபண்டிலும் பெரும்பாலான பெண்கள் முதலீடு செய்யத் தொடங்கிவிட்டார்கள்.
தங்கம் வாங்க அதிக பணம் தேவைப்படுகிறது; தங்க நகை டிசைனும் பழசாகிவிடுகிறது. தவிர, அதை பத்திரமாகப் பாதுகாக்க வேண்டி இருக்கிறது என்றெல்லாம் நினைக்கும் பெண்கள் இப்போது தங்கள் முதலீட்டுக் கவனத்தை மியூச்சுவல் ஃபண்ட் பக்கம் திருப்பி இருக்கிறார்கள்.
பெருவாரியான இந்தியப் பெண்கள் மியூச்சுவல் ஃபண்டில் முதலீடு செய்யத் தொடங்கி இருப்பது ஆரோக்கியமான விஷயம் என்றால், அவர்கள் ரெகுலர் ஃபண்ட் திட்டங்களையே அதிகம் தேர்வு செய்து முதலீடு செய்யத் தொடங்கி இருப்பது இன்னொரு ஆரோக்கியமான விஷயம்.
மியூச்சுவல் ஃபண்ட் முதலீடு என்று வரும்போது இரு வகையில் முதலீடு செய்யலாம். ஒன்று, ரெகுலர். இன்னொன்று, டைரக்ட். இந்த இரண்டு என்ன வித்தியாசம் எனில், ரெகுலர் என்பது டாக்டர் எழுதிக் கொடுக்கும் மருந்து போல. டைரக்ட் என்பது நாமே நேரடியாக மெடிக்கல் ஷாப்பில் மருந்து வாங்கி சாப்பிடுவது போல.
டாக்டரிடம் ஆலோசனை பெற்று மருந்து வாங்கி சாப்பிட வேண்டும் எனில், அவருக்கான ஃபீஸைத் தந்தாக வேண்டும். அது போல, ஒரு மியூச்சுவல் ஃபண்ட் டிஸ்ட்ரிபியூட்டர் மூலம் ரெகுலர் ஃபண்ட் திட்டத்தில் முதலீடு செய்யும்போது, டாக்டருக்குத் தரும் ஃபீஸ் போல சுமாராக 0.5% முதல் 1% வரை தரவேண்டி இருக்கும்.
இந்தக் கூடுதலான கட்டணத்தை ஏன் தரவேண்டும் என்று நினைத்துப் பலரும் டைரக்ட் ஃபண்ட் திட்டத்தில் ஃபண்டுகளை வாங்கிக்கொண்டு இருக்கிறார்கள். ஆனால், டைரக்ட் ஃபண்ட் திட்டத்தில் வாங்கும்போது எல்லோரும் தங்கள் ரிஸ்க் லெவலுக்கும், எதிர்காலத்துக்கான பணத்தை சேர்க்கும் வகையிலுமான சரியான ஃபண்ட் திட்டத்தைத்தான் தேர்வு செய்கிறார்களா என்பது முக்கியமான கேள்வி.
எந்த ஃபண்ட் திட்டத்தில் முதலீடு செய்ய வேண்டும், எந்தத் திட்டத்தைத் தேர்வு செய்யக்கூடாது என்பது தெரியாமலே பலரும் ஏதோ ஒரு ஃபண்ட் திட்டத்தில் முதலீடு செய்யும் நிலையே டைரக்ட் ஃபண்ட் திட்டத்தில் முதலீடு செய்பவர்களிடம் பார்க்க முடிகிறது.
ஆனால், டைரக்ட் ஃபண்ட் திட்டத்தில் நாமே முதலீடு செய்யும் அளவுக்கு அந்த முதலீடு பற்றி தெரியாது. எனவே, ஒரு மியூச்சுவல் ஃபண்ட் டிஸ்ட்ரிபியூட்டரின் உதவியுடன் அவர் வழிகாட்டுதலுடன் முதலீடு செய்வதே சரி என்றுதான் பெண் முதலீட்டாளர்கள் நினைக்கிறார் என்பதையே ஆம்ஃபி நிறுவனத்தின் புள்ளிவிவரங்கள் நமக்குச் சொல்கின்றன.
