லாரி திடீரென பிரேக் போட்டதால் விபரீதம்..அடுத்தடுத்து மோதிய 3 ஆம்னி பேருந்துகள்..உளுந்தூர்பேட்டை ஷாக் | 10 Injured as Three Private Omnibus Buses Collide with Lorry Near Ulundurpet

Tamilnadu

oi-Pavithra Mani

Updated: Tuesday, November 3, 2026, 11:05 [IST]

கள்ளக்குறிச்சி: கள்ளக்குறிச்சி மாவட்டம், உளுந்தூர்பேட்டை புறவழிச்சாலை அருகே சரக்கு லாரி மற்றும் 3 தனியார் ஆம்னி பஸ்கள் அடுத்தடுத்து மோதி விபத்துக்குள்ளானதில் பெண் உள்பட 10 பேர் காயமடைந்தனர்.

சென்னையில் இருந்து பயணிகளை ஏற்றிக்கொண்டு தனியார் ஆம்னி பஸ் ஒன்று கரூர் நோக்கி சென்று கொண்டிருந்தது. அதேபோல் சென்னையில் இருந்து மதுரை நோக்கி மற்றொரு இரண்டு தனியார் ஆம்னி பஸ்களும் பின்னால் வந்து கொண்டிருந்தன.

அடுத்தடுத்து மோதிய பேருந்துகள்

இந்நிலையில், உளுந்தூர்பேட்டை புறவழிச் சாலையில் உள்ள அரசு ஆய்வு மாளிகை அருகே சென்னை – திருச்சி தேசிய நெடுஞ்சாலையில் வந்தபோது, முன்னால் சென்ற சரக்கு லாரி திடீரென நின்றதால், பின்னால் வந்த 3 ஆம்னி பேருந்துகளும் எதிர்பாராதவிதமாக ஒன்றன்பின் ஒன்றாக அடுத்தடுத்து மோதி விபத்துக்குள்ளானது.

பயங்கர சத்தத்துடன் வாகனங்கள் மோதிக்கொண்டதால் பேருந்தில் தூங்கிக்கொண்டிருந்த பயணிகள் அதிர்ச்சியடைந்து அலறினர். இதில் பேருந்துகள் பலத்த சேதமடைந்தன. ஒரு பெண் உள்பட 10 பேர் இடிபாடுகளில் சிக்கி காயமடைந்தனர்.

10 பேருக்கு காயம்

தகவலறிந்து சம்பவ இடத்திற்கு விரைந்த உளுந்தூர்பேட்டை போலீசார், காயமடைந்த 10 பேரையும் மீட்டு ஆம்புலன்ஸ் மூலம் உளுந்தூர்பேட்டை அரசு மருத்துவமனைக்கு அனுப்பி வைத்தனர். இதில் பலத்த காயமடைந்த பெண் ஒருவர் மேல் சிகிச்சைக்காக கள்ளக்குறிச்சி அரசு மருத்துவக் கல்லூரி மருத்துவமனைக்கு அனுப்பி வைக்கப்பட்டார்.

தேசிய நெடுஞ்சாலையின் நடுவே 4 வாகனங்கள் விபத்தில் சிக்கி நின்றதால் சென்னை-திருச்சி தேசிய நெடுஞ்சாலையில் சுமார் ஒரு மணி நேரம் கடும் போக்குவரத்து நெரிசல் ஏற்பட்டது. பின்னர், போலீசார் மீட்பு வாகனம் மூலம் வாகனங்களை அப்புறப்படுத்தி போக்குவரத்தை சீர் செய்தனர். இதுகுறித்து உளுந்தூர்பேட்டை போலீசார் வழக்குப் பதிவு செய்து விசாரணை நடத்தி வருகின்றனர்.