“உங்கள் வங்கிக் கணக்கு முடக்கப்படப் போகிறது… உடனே இந்த லிங்க்கைத் திறந்து விவரங்களைப் பதிவு செய்யுங்கள்!”
இப்படியொரு அழைப்பு அல்லது குறுஞ்செய்தி வருகிறது. பதற்றத்தில் லிங்க்கைத் திறந்து வங்கி விவரங்களைப் பகிர்ந்துவிடுகிறோம். சில நிமிடங்களிலேயே கணக்கிலிருந்த பணம் மாயமாகிவிடுகிறது! அப்போதுதான், “ஐயோ… ஏமாந்துவிட்டோமே!” என்ற பதற்றம் வருகிறது.
ஆனால், அந்த நேரத்தில் பதற்றப்படுவதைவிட உடனடியாகச் செயல்படுவதுதான் முக்கியம். சைபர் மோசடியில் பணத்தை இழந்துவிட்டால், முதல் 30 நிமிடங்களில் என்ன செய்ய வேண்டும்?
நினைவில் கொள்ளுங்கள்: முதல் 30 நிமிடங்கள் என்பது விரைவாகச் செயல்படுவதற்கான வழிகாட்டுதல்தான்; புகார் அளிப்பதற்கான சட்டப்பூர்வக் காலக்கெடு அல்ல. தாமதமாகிவிட்டாலும் புகார் அளிப்பதைத் தவிர்க்காதீர்கள்.
முதலில் 1930-ஐ அழையுங்கள்!
பணம் மோசடியாகப் பரிமாற்றம் செய்யப்பட்டிருந்தால், உடனடியாக 1930 என்ற தேசிய சைபர் குற்ற உதவி எண்ணை அழையுங்கள். இது இணையவழி நிதி மோசடிகளைப் புகாரளிப்பதற்கான 24 மணி நேர உதவி எண். பணம் எந்த வங்கிக் கணக்கிலிருந்து பரிமாற்றம் செய்யப்பட்டது, எவ்வளவு தொகையை இழந்தீர்கள், எப்போது பரிவர்த்தனை நடந்தது போன்ற விவரங்களைத் தயாராக வைத்துக்கொள்ளுங்கள்.
விரைவாகப் புகார் அளிப்பதால், மோசடியாகப் பரிமாற்றம் செய்யப்பட்ட பணத்தைத் தடுத்து வைப்பதற்கான நடவடிக்கைகளை மேற்கொள்ள வாய்ப்பு கிடைக்கும். பணம் ஏற்கெனவே வேறு கணக்குகளுக்கு மாற்றப்பட்டிருந்தாலும், புகார் அளிப்பது முக்கியம்.
1930-ல் புகார் அளித்த பிறகு, உங்களுக்கு SMS மூலம் புகார் எண் (Acknowledgement Number) கிடைத்தால், அதைப் பயன்படுத்தி 24 மணி நேரத்திற்குள் தேசிய சைபர் குற்றப் புகார் இணையதளத்தில் முழுமையான புகாரைப் பதிவு செய்யுங்கள்
இணையதளத்திலும் புகார் கொடுங்கள்!
1930-ல் புகார் தெரிவித்ததுடன் நிறுத்திவிடாதீர்கள். மத்திய அரசின் தேசிய சைபர் குற்றப் புகார் இணையதளமான https://www.cybercrime.gov.in/ வழியாகவும் புகார் அளியுங்கள். அங்கு *Report Other Cyber Crime / Financial Fraud* பகுதியைத் தேர்ந்தெடுத்து, நிதி மோசடிக்குப் பொருத்தமான புகார் வகையைத் தேர்வு செய்து விவரங்களைப் பதிவு செய்யுங்கள்.1930-ல் ஏற்கெனவே புகார் அளித்து Acknowledgement Number பெற்றிருந்தால், அந்த எண்ணைப் பயன்படுத்தி இணையதளத்தில் புகாரை முழுமைப்படுத்துங்கள்.
